好過銅鑼灣拉麵街 的日本正宗 888拉麵

今次"Vivian食食食"要介紹嘅嘢係我同Kenneth都好鍾意食嘅---888日本拉麵。

888拉麵係來自北海道Sanpachi拉麵的一分子，San其實係3的意思，pachi就係8，加埋就是38，而為了更易記於是取名888。

第一次嚟食係拍咗拖無幾耐嘅時候，見到個門口好有日本風味，於是行入去試下。當時個日本老闆用日本口音啲廣東話同我哋講，"食唔食煙嫁"...Kenneth 一時都聽唔明(p.s. 因為 Kenneth識少少日文，一時無諗過佢會講廣東話，所以聽唔到)，反而唔識日文啲Vivian一聽就聽到...哈哈....

嗰次食咗啲乜而家就唔係好記，不過當時間舖頭好似只係得唔同湯底嘅义燒拉麵食。好多日本人去食，都好爆嫁，環境都幾好嫁，又坐得舒服又靜，而且仲有廚房境睇添。Kenneth就最鐘意，因為可以見到啲人點樣整啲拉麵嗎 :P。 碗义燒拉麵好好味，...Kenneth仲特登食到"shuuuu shuuu" 聲引我笑，好開心，好sweet....

幾個月之後再去，唔見咗個日本老闆，唔知佢係唔係返咗鄉下...但係佢一唔係到，間舖頭好似小咗啲嘢咁。今次去多咗豬扒係菜單到，當然要試下啦....豬扒都幾好味，但啲义燒就差咗好多，薄咗好多...好唔開心><，連Kenneth最鐘意嘅廚房境都無咗....

近日因為想係blog到介紹呢間拉麵店，所以再去，好彩個日本老闆返咗嚟，佢嘅廣東話進步咗唔少，起碼kenneth已經聽到老闆係講廣東話...哈哈...廚房境又返咗嚟...kenneth 好開心 :)

今次我哋叫咗鹽味醬油义燒拉麵同肉味醬油义燒拉麵加埋一客吉列豬扒，呢鋪水準返晒嚟啦。碗麵啲义燒好多好厚好滑好"林"好有口感好好味，麵質好好，唔會太"林"，我最怕食啲好熟同好"林"嘅麵...湯就仲好味，其實之前都已經試過好多隻味，隻隻都咁好味........價錢都幾貴嫁，成hk$60-70 一碗，不過好飽，如果己拍拖嚟計，2個人加埋都唔洗HK$200，就覺得好ok

豬扒都幾好味，又"林"，又多汁.....yummi，快啲去試下啦!























P.S 888日本拉麵除咗銅鑼灣，尖沙咀都有分店，但我就未去過，不過見到openrice啲評語好似銅鑼灣好味好多咁，唔好去錯喎。仲有888拉麵係街鋪黎嫁，我已經mark左落個map度，想食就去下啦!