2006大嶼山聖誕之旅 - 大澳

由寶蓮禪寺坐巴士(好似係21號)唔洗20分鍾就去到大澳...
去到大澳，當然唔少得周圍搵下馳名的'茶果'啦，不過由於之前實在食得太飽，所以真係食唔落.雖然冇食到，不過聞落...茶果的味道有啲似日式草餅，而且原來'茶果'只是統稱，其實佢地仲有好多款式的.
當然除了'茶果'，當然仲有水郷特產，蝦乾，白飯魚乾，仲有好正嘅生插'蠔市'啦.
來到大澳，我覺得在這裡食海鮮比西貢還好，雖然這裡沒有大龍躉，但樣樣海產都生猛活潑，價錢又十分商宜.
在大澳的漁檔之中，我地發現了一種從未見過，樣貌好似大圓石春的蟹呢....不過我地唔知佢叫咩名:p
大過舊石的巨硯.....
從前的横水'渡'現在已經不復見，取而代之的是這條藍色的大鐵橋........ 從前遲遲都未能訪問大澳，現在真是有點可惜:(
在那條代替横水'渡'的大鐵橋之下，我地發現左兩架有趣的'賣魚船.魚船的船身被改裝成一個魚缸，裡面養着鮮魚^^
如果要買魚船上的魚，你只需對漁家講你要咩魚(其實要買蝦蟹蜆螺都得....應有盡有...勁!)，佢會用一個長柄籃遞條魚比你睇，你覺得條魚ok，佢會幫你入落膠袋，再用長柄籃遞比你，到時你只要放錢入個籃到就完成交易嫁啦^^
大澳裡面最有趣的可以話係過左横水'渡'鐵橋之後的水產街， 有大大條鹹魚(唔講你唔知鹹魚除了有'梅香'之外，還有'蒜子肉'，同埋'實肉'呢^^)
.......以下係一條鹹大龍躉.....
鹹大龍躉旁的是一條鹹鯊魚....^^'問你驚未!
之後仲有新鮮海產， 有海產小食...例如:炭燒瀨尿蝦乾， 炭燒魚子乾....等等.............你地睇下為食嘅vivian睇到聚精會神咁就知道好香口...又好味啦......(當然vivian又買左啲黎食啦^^')
之後我同vivian都買左啲當地特產咸魚，後來回到家中vivian的媽媽立即泡製了一條香煎咸魚，wa嗰仲香味真係唔講得小.後來仲有時間，我地仲遊船河睇日落添....

以下是其他我覺可以見得下人的照片..... 多謝收看!

全圈完

2006大嶼山聖誕之旅 第四站 -- 寶蓮禪寺

經過寶蓮禪寺,當然唔少得入去參觀下啦!

大雄寳殿外的一樑一柱都有豐富精彩的雕刻.

以下呢條盤龍石柱唔講得小,上面有很多不同的動物,我同vivian都係到玩左一輪尋寳呢!

除了龍以外,有魚,有蟹,有龜,有珊瑚!



參觀完寶蓮禪寺,本來一心只係食齋,點知當日仲有,少林功夫同鐵頭功表演....即時想起少林足球嘅片段,vivian都忍唔住要唱:少林功醒...(好好爺!)少林功勁...(係好勁!)我係鐵頭功...無敵鐵頭功~~~......

Vivian 問:點解冇天下兵器之首"摺櫈"嘅?
Kenneth : ( -_ -")

飛龍九天~~~~yeah!!!

睇完表演,去食齋...啲齋比想像中好食,因為嗰朝早消耗太多,見到3餸一湯(相中的是2人份量,如果你係大佛山脚入口處買齋卷時,話四人或以上的話,餸就會有一條芋頭素魚或素酸甜排骨).

由於白飯任"裝" ,不知不覺食咗好多飯添...好飽(如果你剛剛行完山,呢餐一定夠飽)

為食嘅vivian,又話要食,見到有兩檔糕點,一檔係食堂門口有素點心,一檔遠啲差不多去到右側盡頭,那裡只有素甜品.於是比我地發現甚小宣傳的寶蓮禪寺甜品,實在好好味用料十足,仲要自家製不是酒樓貨,好味!!!

寶蓮禪寺連警告字句,都"佛"味濃濃.... :p

食飽飽,去埋藏經閣偷學下九陽神功之後,又係時候起程去下一站.

下一站.....大澳

2006大嶼山聖誕之旅 第四站 -- 天壇大佛

離開市集之前, 再來一張遠攝'大佛’。(這張相我真係幾滿意^^)
接著我地就上'天壇大佛', 要行成二百六十八級石階,講真感受好深,背負6,7磅重嘅攝影器材,我同vivian的腳都不自覺的震........講真唔野小。
當日的天氣實在太好,藍天白雲之下,再加上行上二百六十八級石階的辛勞,真係有種西遊記所寫的到西天取經的感覺。
如來坐有六尊仙女銅像,形態各有不同,而每位都手執不同的法寶,並向着佛陀敬奉,一片莊嚴平和。
這張相我希望透過廣鏡可以拍出迎佛西來的感覺。
雖然實在有些不敬.....不過我真係令我想起了我的朋友 IVAN 和 CHRIST........ >< 罪過罪過。
身處蓮座之下,上仰如來.......感覺真是有些沉重.....
講真替大佛拍照,由其是當拍攝他臉龐的時候,心裡不自覺地會想起自己的卑微。
蓮座下刻有法師的法號...... 不過我想這和'某某到此一遊'實在無甚分別....不竟禮佛之後記名實在有些'着相'了。
離開前,梯階處銅鼎上的銘文,讓我地終於知道是誰有此能耐去建造出如此巨大的戶外佛像呢....

下一站 -- 寶蓮禪寺

2006大嶼山聖誕之旅 第二站 -- 昂坪吊車

昂平360的吊車(坐10人)明顯係大架過海洋公園的吊車(坐4-5人)

出發lu....相中的就是昂平360的東涌上車月台總站.

如果你click開張相你會見到遠處從右之左係有啲細細架嘅吊車, 其實呢個就係'昂平360'同其他吊車最唔同嘅地方, 吊車經常會進入纜塔及轉向站(相中左方的大型建築),並在這建築物中作 90度水平轉向,真係大開眼界.

吊車在離開第一個轉彎站之後,會經過一個大海灣(如果大家知道,敬請賜教^^),這裡有船經過,又有人撐艇釣魚(下圖).

這個是我用長鏡影海灣上面的釣魚人的. (我都好耐冇釣魚啦....搵日釣下魚先得)

吊車的右手面可以遠望整個新機場同跑道上的飛機.

上圖係我們經過其中一個纜塔嘅時候所拍攝到的, 你可以見到遠處的東涌新市鎮, 同埋纜塔的複雜結構, 你地諗下當日啲驢仔同建築工人起得幾辛苦呀!

當吊車張近要到達第一個纜塔及轉向站的時候, 吊車會作45度左右的爬升,望上去好高,同車的小朋友都話幾驚架.

上圖就是纜塔及轉向站的近照. 要係山上建立如此巨大的建築,唔怪得當日要用驢仔運材料上山啦....... 我有位朋友讀土木工程,唔知佢會唔會覺得有份參與這些建設會係一件好自豪的事呢!

上圖就係吊車入到去轉向站的情景, 你唔好以為這裡冇人控制,其實每個站塔你都會見到有工作人員註守.....講真呀!番工要爬山上去這裡,呢份工的確唔易做, 有勞啦 ^^' 各位註守工作人員.

WA! 上到山頂仲勁, 如果話海洋公園的吊車係依山以建, 咁昂平360的吊車可以話係吊在一條山頂到山頂中間的吊纜上面的吊車, 有時吊車可以離地成廿幾三十層樓高.........簡直好似飛咁 !!

吊車下你可以見到一條由山腳一路彎彎曲曲經過多個山嶺嘅行山經........ 真係有人行嫁! 佩服!

長鏡下你會見到行山徑的每段路,都是由木板或石板鋪設又有扶手....我諗行應該幾好行,不過上落幅度真係幾大,鍾意行山嘅人真係應該挑戰下.

沿路你會見到多條行山徑, 有好幾個分义, 有心想挑戰下的朋友, 我諗你地先要查清楚點行至好.

Click 大張相, 你會見到行山徑旁有一個山間水泉, 相信係度洗下手, 涼一涼, 可以休息番一陣相信會係幾舒服嘅.

上圖係到達昂平市集前最後一個纜塔及轉向站, 望落去簡直好似星球大戰裡面嘅基地同機械人一樣, 山頂上突然有舊咁嘅野真係好壯觀.

好野! 終於都望到大佛同昂平市集啦....... 咩話你睇唔到..click 大張相就睇到嫁啦!

嘻嘻....遠鏡下的大佛.......冇腳架都幾難影.

YEAH! 昂平市集全景~~~

落左吊車後你仲可以同吊車影一陣相, 冇人會話嫁....不過影一陣好啦喎^^

下一站 -- 昂坪市集